පාසල් විෂය නිර්දේශය හා එම විෂය දැනුම කට පාඩම් කොට විභාග සමත්වීම පමණක් අරමුණු කර ඒ සඳහා කැපවීමෙන් ලබා ගන්නා අධ්‍යාපනික සාර්ථකත්වය අනාගත තාක්ෂණික ලෝකයේ රැකියා වෙළඳපොල වෙත පිවිසීමට හා රැකියා වෙළඳපොල ජය ගැනීමට ඍජු දායකත්වයක් නොදක්වන බව අප විශ්වාස කරන්නෙමු.

අද වන විට සාම්ප්‍රදායික රැකියා අවස්ථා අවම වන තත්වයක් පවතින අතර එම රැකියා සඳහා නවීන තාක්ෂණය මුසු වීම මගින් බොහෝ පිරිසක් විසින් සිදුකරන කාර්යයන් පරිගණක තාක්ෂණය, රොබෝ තාක්ෂණය, ්ෂ තාක්ෂණය හරහා අවම පුද්ගලයන් පිරිසක් හරහා සිදු කර ගත හැකි වී ඇත.

මේ හේතුවෙන් සෑම වසරකම අ.පො.ස. (සා/පෙළ), අ.පො.ස. (උ/පෙළ) විභාග සමත් වන දරුවන් මෙන්ම උපාධිධාරීන් ලෙස සමාජයට එක් වන බහුතරයක් දරුවන්ට රැකියා විරහිතව, ඉතා අඩු වැටුප් සහිත රැකියාවල හෝ තමා අකමැති රැකියාවල නිරතවීමට සිදුවී ඇති බව පැහැදිළිය.

මෙම තත්වයට හේතුව වන්නේ දරුවන් කුඩා වයසේදී තමාගේ දක්ෂතාවය/හැකියාව හඳුනා ගැනීමට අපොහොසත් වීම සහ පාසල් අධ්‍යාපන ක්‍රමය තුළ පවතින තරගකාරී විභාග රටාව හේතුවෙන් එම හැකියාවන් යටපත් වීමත් විභාග සමත් වීම, ජීවිතය ජය ගැනීමට ඇති එකම මග ලෙස සලකා කටයුතු කිරීමත් ය.

ඒ අනුව දරුවාගේ පාසලේ එක් එක් විෂයය ලකුණු මත දරුවාගේ අනාගත වෘත්තීය මාර්ගය තීරණය කිරීමෙන් එහා ගිය නව අධ්‍යාපනික සහ වෘත්තීය අවස්ථා සඳහා දරුවා යොමු කිරීම මගින් ඔවුන්ට තම හැකියාවෙන් හා දක්ෂතාවයෙන් ප්‍රයෝජන ගෙන ඊට සමගාමී අධ්‍යාපනයක් ලබා ඒ හරහා රැකියාවක් තොරාගැනීම මගින් සතුටින් රැකියාවේ නිරත වීමටත්, එමගින් ජීවිතය සාර්ථක කර ගැනීමට දරුවන්ට මග පෙන්වීම අපගේ වගකීම කොට සලකන්නෙමු.

දරුවන්ගේ ජීවිත නිවැරදි මාවතට යොමු කිරීමේ උදාර අරමුණ ඇතිව ක්‍රියාත්මක කරනු ලබන”Career Counseling & Coaching” අපගේ ජාතික තලයේ වැඩසටහන දැයේ දරුවන් වෙත අප තිළිණ කරන්නෙමු.